అంగరంగ వైభవంగా శ్రీ మార్కండేయ స్వామి దేవాలయం 12వ వార్షికోత్సవం

తాండూరు పద్మశాలి సమాజం ఆధ్వర్యంలో ఘనంగా వేడుకలు

హోమాలు, అభిషేకాలు, అన్నదానంతో భక్తి వాతావరణం

శ్రీ శివానంద గిరి స్వామి ప్రవచనాలు భక్తులను ఆకట్టుకున్నాయి

ప్రతిభ కనబరిచిన విద్యార్థులకు ఘన సన్మానంతాండూరు, జూన్ 14:.. వికారాబాద్ జిల్లా తాండూర్ పట్టణంలోని కొడంగల్ రోడ్డు మార్గంలో ఉన్న శ్రీ మార్కండేయ స్వామి దేవాలయం 12వ వార్షికోత్సవం ఆదివారం అంగరంగ వైభవంగా నిర్వహించారు. తాండూరు పద్మశాలి సమాజం, మార్కండేయ కాలనీవాసుల ఆధ్వర్యంలో నిర్వహించిన ఈ వేడుకలు భక్తిశ్రద్ధల మధ్య ఘనంగా సాగాయి.
ఉదయం 7.05 గంటలకు స్వామివారికి ప్రత్యేక అలంకరణ, అభిషేకం, మంగళహారతి కార్యక్రమాలు నిర్వహించారు. అనంతరం ఉదయం 9 గంటలకు గణపతి హోమం నిర్వహించగా, మధ్యాహ్నం 12.05 గంటలకు మహా నైవేద్యం, మంత్రపుష్పం, తీర్థప్రసాదాల పంపిణీ చేపట్టారు. అనంతరం మధ్యాహ్నం ఒంటిగంటకు అన్నదాన కార్యక్రమం నిర్వహించి భక్తులకు ప్రసాదాలు అందజేశారు.
ఈ సందర్భంగా ప్రముఖ ఆధ్యాత్మిక వేత్త శ్రీ శివానంద గిరి స్వామి ప్రవచనాలు నిర్వహించి ధర్మం, భక్తి, మానవ విలువలపై సందేశం అందించారు. అనంతరం గీతా పారాయణ కార్యక్రమం నిర్వహించగా భక్తులు భక్తి పారవశ్యంలో పాల్గొన్నారు.
వార్షికోత్సవ వేడుకలకు తాండూరు పట్టణంతో పాటు పరిసర ప్రాంతాల నుంచి పెద్ద సంఖ్యలో భక్తులు తరలివచ్చి స్వామివారిని దర్శించుకుని ప్రత్యేక పూజల్లో పాల్గొన్నారు.
అనంతరం 2025-26 విద్యా సంవత్సరంలో పదో తరగతి, ఇంటర్మీడియట్ పరీక్షల్లో ప్రతిభ కనబరిచిన పద్మశాలి సమాజం, మార్కండేయ కాలనీకి చెందిన విద్యార్థులను ఘనంగా సన్మానించారు. విద్యార్థుల విజయాలను అభినందిస్తూ భవిష్యత్తులో మరింత ఉన్నత స్థాయికి చేరుకోవాలని పెద్దలు ఆకాంక్షించారు.
ఈ కార్యక్రమంలో పద్మశాలి సమాజ పెద్దలు, మార్కండేయ కాలనీవాసులు, మహిళలు, యువత మరియు భక్తులు అధిక సంఖ్యలో పాల్గొన్నారు.